吳若希「女兒」接受手術感心痛：人生總是充滿挑戰

藝人吳若希係愛犬之人，就算為老公Alex誕下1仔1女，未有因偏愛仔女而忽略愛犬「Honey」，更視佢為親女兒一樣。佢喺社交網發文，表示愛犬尋日（9號）進行手術，雖然未有詳細透露病情，但坦言感到心痛：「人生總是充滿挑戰⋯昨天Honey做了一個小手術，看到她身上的血，為她心痛的同時，也要克服害怕。加油！」圈中藝人呂慧儀留言打氣，希望「Honey」早日康復。

另外，吳若希喺另一個家庭帳號晒出囝囝嘅生活照，相中見囝囝肥嘟嘟，對食物玩具好有興趣，難怪吳若希留言：「睇吓佢既（嘅）身形，睇吓佢件衫上面粒鈕，就知道佢個學習一定會由食物開始！」