【曾破香港紀錄】郭富城愛駒舞士精神絞腸痧離世

今日（10日）郭富城中唔到新馬籤，但都唔係最慘，因為佢現役名下嘅「舞士精神」，今日絞腸痧不幸離世！

現年5歲、隸屬方嘉柏馬房、獎金達400萬嘅83分馬「舞士精神」，喺香港贏過4場頭馬，早排5月下旬克服傷患，出戰谷草1,000米，喺莫雷拉胯下贏馬，更以56秒09打破同程全港紀錄，當晚城城更帶埋老婆方媛一齊開開心心拉頭馬，估唔到事隔兩星期，「舞士精神」就絞腸痧，雖然曾經做手術但最終仍然救唔番！

方嘉柏回應東網記者，話非常傷心難過，至於馬主城城更加唔使講，當日影頭馬相時，已經話好心痛「舞士精神」受傷患折磨，現時愛駒離世，相信城城一定好傷心，希望佢哋節哀！