被遮遮甜美歌聲冧爆！張敬軒：唔好再問我點解唔換人

藝人張敬軒經常將工人姐姐（遮遮）嘅「伏味早餐」放上網，搞到一眾粉絲都好擔心偶像冇啖好食，仲叫軒仔不如請過個姐姐啦，但係軒仔一於少理，仲好樂意成為「早餐KOL」，但其實有一個好重要嘅原因，點解軒仔唔炒咗遮遮？就係佢原來係唱得之人，軒仔喺社交網Post咗段片，原來係遮遮開緊個人「演唱會」，甜美嘅歌聲聽到軒仔如癡如醉，兩隻腳掌不停為遮遮打拍子，佢留言話：「唔好再問我點解唔換人，因為我哋有好多共同嗜好，阿遮今晚演唱會，玩咗個幾鐘。佢應該未知我返咗嚟。」到咗昨日（10日）晚上10時多，軒仔再更新話：「我啱啱問佢其實玩緊咩？原來係試緊個卡拉OK App。」大批網友就留言叫軒仔下次演唱會不如搵遮遮做嘉賓！