孖何遠東「姊弟」檔搵銀　江欣燕怕熱放假抖暑

藝人江欣燕（欣欣）與何遠東（東東）出席矯正座墊《Gravity聯乘千色Citistore初夏發布會》，二人曾於劇集演姊弟，今次拍住上搵真銀。欣欣表示近期經濟有好轉，能夠有機會出席商場活動兼有利是收覺得非常感恩，寄望各行各業也逐漸蓬勃起來：「好似好耐冇出過街咁，嚟緊放吓假先，因為唔想36度出住汗開工、補妝，真係試過會暈，所以休息兩個月先。」

而同樣放假中的東東，則透露參與帶貨比賽，但預計會輸，故只抱住學習心態：「個比賽好刺激，小寶（陳嘉佳）實在太有成績，佢喺內地一晚做到幾百萬成績。（有冇向佢取經？）有請食飯，一餐食我幾千蚊，騷錢都畀埋佢，但佢咁好成績我真係好佩服，平時以為帶貨着重介紹產品，但其實點運用鏡頭都好重要，所以我嚟緊希望多方面發展。」