陳庭欣用鸚鵡Sell狗糧　夠晒諗頭！

藝人陳庭欣（Toby）於網上開設個人寵物頻道，今午她更於將軍澳舉行寵物市集。對於首次舉行相關活動，她自言壓力非常：「好多嘢都要落手落腳自己做，尋日（11號）仲整咗12條貼文宣傳，呢幾日真係唔係好夠瞓。以前喺公司開工有空檔，我會食吓零食、休息吓，依家就搏命做自己嘢。」

當問到男友有否支持，她表示：「佢派出咗自己嘅團隊幫我手，市集嘅過萬元獎品佢係最大嘅贊助。」她坦言目前頻道營運資金全靠自己：「好彩拍嘢都有朋友幫手收友情價，我哋都只係想推廣養寵物嘅正確訊息，例如唔好棄養。希望愈做愈好，遲啲有資格去會展搞大型嘅寵物活動，好似香港寵物節咁。」家有多隻鸚鵡及新添兩隻小狗的她，有意用寵物推出個人品牌：「好似我隻鸚鵡Shabu咁，佢好有人氣，用佢個樣去推出狗糧啦，真係可以諗吓。」