冇禮金都嫁畀陳柏宇卻遭狂踩 符曉薇發文嬲到想離婚

20210613
東網電視
更多新聞短片
歌手陳柏宇(Jason)同符曉薇結婚4年,誕下愛女Abi後,一家三口共同走過高山低谷。符曉薇早前自爆胎兒患愛德華氏綜合症,要人工流產,Jason全程陪伴太太走過低潮。
不過兩公婆相處難免出現問題,符曉薇尋日(12日)喺社交網限時動態發長文,字裏行間話老公令佢感到委屈,更講明好想離家出走。疑似離婚Post見街後,符曉薇好快刪文,但已被網民Cap圖,佢喺長文寫道:「如果唔係因為Abi(女兒)我離家出走咗。好嬲好嬲你。我乜都唔要就嫁畀你,冇求婚、冇禮金、冇過大禮,仲將自己嘅金器畀晒你賣。因為我一路覺得你值得,值得我乜都唔要,淨係要你,我以為你都係咁,你會珍惜我,點知聽到原來我畀咁多壓力你,嗰刻真係想離開。不過算啦,大個女㗎啦,過咗就算,希望以後就算唔稱讚,都唔好踩到一文不值。」
長文已刪,符曉薇社交網剩下佢哋一家三口去Staycation嘅相,佢又留言:「可以放鬆吓,尋日香檳,今日紅酒。」完全唔似同Jason嗌過交。據知佢今次發文,係因為覺得老公唔似佢一樣懂得稱讚對方,反而係經常挑剔同傷害佢,令佢感到委屈,更曾嬲到想離婚。而Jason之後亦寫咗一篇長文向老婆道歉,自認冇理會老婆感受,而唔尊重對方嘅態度係需要改變。
經過一晚沉澱,符曉薇話係冇睇Live嘅朋友喺度大做文章,又話收到好很多記者來電,連經理人也嚇一跳:「都係我衰 搞到咁大個烏龍出嚟!」而Leanne再喺社交網Post一段幸福宣言:「一個會用心去哄你仲會用千字文認錯嘅男人,其實好難得,有時大家一齊耐咗好多嘢都會懶咗,呢個懶會令大家愈嚟愈生疏會有更多誤會出現,如果有個唔怕煩會用心去告訴對你嘅愛嘅人,呢個人值得你穿白色婚紗付托終身畀佢,我已經搵到!」
另外,Jason同符曉薇今日再開直播講番件事,Jason笑言事件愈鬧愈大:「好勁件事,令有廣告客戶因為驚我哋關係有破損,唔敢出我哋之前一啲拍嘅嘢,幾大件事。夫妻吵架好正常,也是一件平常事情,只是被人煲大,絕對冇離婚嘅想法!」不過Jason強調有一點係真,就係窮!
陳柏宇接受訪問時表示太太嬲足1日,但已氹番太太開心,又指:「氹番之後,佢做Live時,啲Fans叫佢Send我氹佢篇嘢畀大家睇,佢又擺埋佢嬲時寫嗰篇嘢咁解咋嘛,佢唔係第一次咁樣嬲,我一定氹到佢,我一定會氹番佢,我唔係因為一定會氹到佢而Hea做,真心嘅我同佢關係係最緊要嘅。我唔驚佢離家出走,我好熟佢,我哋真係天生一對,哈哈!佢同我都開咗過Live,我喺係自己個社交網擺咗我氹佢篇嘢,大家睇同聽埋成個Live,就會知所有嘢。」