英皇搞真人騷選「新秀」 騎呢新人嚇窒軒仔祖兒

20210614
東網電視
更多新聞短片
近年香港興起選秀真人騷熱,唔少年輕人都想博一博,搞唔同平台表現自己,隨時由素人升呢做藝人,而英皇娛樂旗下線上平台都搞咗個真人騷《冤枉新秀訓練營》,日前已揀出14位參加者,喺主持人李靖筠(Gladys)帶領下,於3個月內接受歌唱、舞蹈、演戲及形象改造全方位特訓,當中霍汶希、張敬軒、容祖兒、泳兒、許靖韻等藝人擔任評判或導師,進行淘汰制揀人,勝出者成為英皇簽約新人,受公司重金力捧。
尋晚(13日)平台就搞咗個直播騷,等參加者同大家見面,當中不乏唱得之人,但同時亦有騎呢選手以另類方式博得大家眼球,就好似怕醜仔Woody咁,雖然佢外形未算出眾,皮膚管理亦不如理想,細細聲又驚青,但係就得師兄張敬軒力撐,講到明會畀機會佢。另一男選手Chris就喺張敬軒面前大唱《櫻花樹下》,獲軒仔評語「唱咗第2個旋律出嚟」,認真大膽。
而女選手亦同樣「驚人」,當中Racy皮膚黝黑又自稱「黑妹」,着皮褸高唱《浮誇》,一去到高潮位佢更加一個華麗轉身,除咗除埋皮褸亂揈,佢仲拗晒腰、遮面、摸頭,用「沉浸式」方法獻唱,成功嚇窒評審李靖筠同衛詩雅。