咩波都識玩!陳曉華外表斯文活力驚人

20210615
東網電視
更多新聞短片
藝人陳曉華中學時期讀女校,當時相當好動,打籃球、排球、就連足球都踢埋,雖然四肢發達,但手腳並不協調。之前趁未開劇,身體又不好,一次過學多樣運動,包括滾軸溜冰、網球、跆拳道等,外表斯斯文文卻活力驚人。
她接受東網訪問時謂:「入行後我一直未停過工作,之前停工大半年,發現好多缺點,體能都幾差,想改善一下,不過練番好個身體嘅同時,喺呢段休息時間我都脹咗唔少,成日食嘢,由上年10月到依家,我足足重咗20磅,真係脹咗好多,依家要靠做運動減磅,我之前真係試過喺Gym房做運動攰到嘔,依家每日只會喺8小時內食嘢,已經瘦番10磅,希望盡快回復1年前。」
打網球唔怕曬黑
日前,她就跟教練練習網球,拿起網球拍的她每次擊球都相當有力,絕對不容看小,她又認叻說:「讀書時期,其實除咗游水之外,我乜都玩,籃球、排球、羽毛球、乒乓波都有,仲有跟阿哥去踢波,之後大學幾年要讀書,身邊又冇乜朋友陪做運動,所以身體差咗好多。」說到打網球很容易曬黑,不少女仔都「怕怕」時,她說:「係呀!好少女仔唔怕曬,我唔怕,因為自己係易黑易白,好多人覺得我好柔弱、斯文,但我完全唔係,我係陽光女孩嚟㗎!我都宅,但我都好鍾意做運動。」
學戲惡補演技
講到她正為新劇《廉政行動2022》拍攝中,問到之前停工1年會否很徬徨時,她說:「還好,自己有趁呢段時間學戲,惡補一下。(之前被批講對白唔好!)老師點評我嘅都好類近,佢哋話我唔能夠發自內心,之前喺片場好緊張,唔知做緊乜,以為已經好投入,依家會將自己學到嘅應用落去,拍攝時自己會輕鬆啲。」
至於上年《迷網》播出時,她坦言壓力相當大:「嗰陣我拍緊《異搜店》,我唔知自己點改善,第一次拍劇一竅不通,真係好迷惘,好多前輩有指導我,拍《異搜店》時自己都要求高咗,想做得好啲,有時間導演都容許我嚟多幾Take!(有冇壓力爆煲?)一開始有呀!拍《異》時一開始好驚,試過休息時會喊,又試過食食吓飯去咗廁所喊,覺得自己點解做極都做唔好,不過應該冇人發現我去咗喊。」
提到今屆港姐正在面試中,貴為2018年港姐冠軍的她,與之後幾屆的港姐都有拍劇,事業發展不俗,問會否怕很快被「過頭」時,她說:「我自己冇諗過呢啲嘢,選完港姐3年,睇番以前都好似妹妹仔咁,希望試多啲唔同嘅嘢。」
同狄易達係朋友
愛情方面,之前一直有傳她與狄易達翻撻,說到此時,她說:「之前啲緋聞過咗去嘞!依家我都係單身,我同佢係朋友。(唔想拍拖?)我唔急拍拖,我嚟嚟去去都係同幾個女仔朋友玩,又唔覺得好需要拍拖,因為一拍拖就要諗結婚。(咁快?26歲啫喎!)係呀!所以唔想諗得咁複雜。」