Anson Lo嗲爆「男友」姜濤 男女通殺

2021年06月17日 09:07
東網電視
更多新聞短片
ViuTV節目《調教你MIRROR》現正熱播,組合MIRROR接受演技挑戰,並選出3強進入第2回合。成員Anson Lo早前拍攝電影《假冒女團》扮女生,昨晚(16日)在節目內「冧莊」,扮演女角「素恩」與姜濤大演對手戲,想不到甫登場他即出現蝦碌情況,開不了門要工作人員幫手,卻無損他投入角色,向「男友」姜濤大發嬌嗔,投訴導演要求他NG 19次,說到激動勁大力推開對方,結果被形容表現驚喜非常。
而姜濤與Lokman演出亦獲評審大讚,3人成功進階。Anson Lo即變身男主角,與女拍檔對演餐廳戲,一口氣背誦3頁對白,就連他自己都驚忘詞,幸而順利過關。節目末預告內,Lokman談感受時爆喊,相信令一眾鏡粉相當期待。
另早前其中6子Alton、Frankie、Jer、Jeremy、Stanley及Tiger孖導師梁祖堯(阿祖)齊齊受訪,講到入Camp嘅難忘事,Alton就話最後嗰一日大家一齊開啟放假Mode,製作組仲好Sweet咁實現晒每個人嘅願望,有啲就係去沙灘游水、有人踩單車、有人就咁喺度行吓街,而佢就揀咗去沙灘玩:「難忘在喺入行後有時間都寧願留喺屋企,好少會出去,因為覺得出去會好唔方便,出去可能要有個伴,但又唔知搵咩伴好,加上疫情好似冇乜機會同班朋友聚會,仲要係我哋(MIRROR)出去玩喎!但我唔係單單講緊去玩樂,係講緊嗰一刻個心情,喺呢個Camp之前就算有呢個機會去玩,都可能唔係咁放心,係真係經過今次解開咗啲心結之後,用呢個咁好嘅心情去進行一個咁好嘅活動,其實係錦上添花!」
Frankie笑話節目完咗之後多咗個「智者」嘅稱號,其餘5子即取笑佢因為永遠理解唔到當刻發生咩,大智若愚咁,Frankie繼續講:「互相欣賞大家多咗,但對我嘅欣賞又過度咗,其實我有好多嘢都唔經大腦咁樣講、或者做,成日都好失魂咁樣,佢哋見到我有呢個弱點喺度,就即刻問我嘢,嗰陣我講咗啲連自己都覺得係語出驚人嘅說話,但依家已經唔記得咗係乜嘢嚟!跟住佢哋就叫我做智者,原來我發覺我呢一點原來佢哋都會欣賞㗎喎!就繼續做多啲,當做善事咁樣都好呀!哈哈!」
問到經過今次Camp,之後會想一齊住?Stanley搶答笑話係關乎土地問題,而至於現實嘅問題,第一時間Jeremy應該會癲:「到時佢真係會變咗個女傭融入家中,佢好需要整齊,又會忍唔住照顧大家嘅所有嘢,所以一係就你死、一係就佢亡!」