「東涌羅浩楷」不忿被利用眾籌　林作：開玩笑方式抽水

曾參加《2021香港小姐競選》首輪面試，以一身騎呢大媽打扮，再加上「佛手」姿勢而成名嘅「東涌羅浩楷」，由於未能入選複試，好多網友都關心佢嘅去向，早前被起底後，佢嘅社交網追蹤人數好快增加到4位數，佢都即刻自拍一段片答謝網友，同大家打聲招呼，粉絲即刻留言「i love you」、「真係人靚聲甜，加油」，非常正面，亦都冇人踩佢！

現年22歲嘅Kirsten，被網民起花名「東涌羅浩楷」，不過佢唔介意成為揶揄對象，反而開心有能力帶畀大家歡樂，生性樂天嘅佢，從小就發選美夢，父母是內地、西班牙、菲律賓混血兒，佢於香港土生土長，小學中學都喺香港就讀，讀大學就喺菲律賓。雖然就讀中文學校，但卻入讀了以英文教學嘅班別，所以佢唔識廣東話，最多只識講「你好」。

而佢中文名其實叫「利愛安」，林作冒認為佢做提名人之後，更幫佢改名為「霍韻璇」，惹起天大誤會，不過佢冇嬲林作，但就叫大家唔好信網上眾籌一事，表示自己唔識林作，而港姐提名人係佢哥哥，佢唔鍾意有人利用佢個名嚟敲詐金錢。

對於Kirsten指利用佢個名嚟眾籌，林作回覆東網表示：「本人一直本着開玩笑方式抽水，英文，這叫做trolling，並無惡意，更未至於『利用他人獲利』。事實是，毫無任何人問津眾籌，本人也從未邀約Kirsten進行合作，甚至不讓絕大部分人打擾她，可以說是倍加呵護的典範。」

林作又稱沒有他就沒有Kirsten：「目前Kirsten成為了本屆港姐最受矚目小姐得主，本人深感欣慰，並不求Kirsten回報，僅僅想和大眾講聲：『係我獨具慧眼，在芸芸「高手」中，揀佢出嚟捧嘅。在我出招前，佢並未特別彈出，仍然有另外至少半打友同佢並駕齊驅。我的吹捧，令佢最後單獨跑出，我真的很為她感到驕傲。希望第日可以請佢飲茶。而我講笑的過人之處，在於有時候真假難辨，認真便輸了，一分錢沒收過，但明眼人從來都知道，本人完全無惡意，她只是獲得了名氣，歡迎網友指正，但從來無傷大雅，本人從來都係玩得好大嘅，毫無惡意，真心支持，現在成就偉業，成為今年第一個接受專訪之佳麗，請問該感謝我還是咒罵我？！沒有我，有Kirsten嗎！我自此宣布，Kirsten榮獲2021年香港小姐競選最受矚目小姐獎。』」