徐若瑄被囝囝一句話考起　對話睇到網民眼濕濕

台灣女星徐若瑄當年千辛萬苦誕下寶貝仔Dalton，同時亦兼顧家庭及演藝事業，一啲都唔簡單，日前突然腹部疼痛，身體不適依然氹囝囝瞓覺，點知囝囝突然攬住佢，含住淚水問「你幾歲會死掉」，對話曝光後令一眾網民睇到眼濕濕！

佢當晚如常氹囝囝瞓覺，但因為腹部劇痛，令囝囝突然緊抱住問：「媽咪，我真的好愛妳！妳可不可以不要那麼快死掉...你幾歲會死掉？」徐若瑄就安撫囝囝指自己身體健康，可以活到100歲，點知囝囝反問自己幾歲會死，佢就回答：「媽咪每天給你吃得那麼健康，你一定也可以活到100歲。」囝囝聽完更激動，並哀求佢：「你不是說我們差40歲，我很愛你，你可不可以等我到100歲，我們再一起死。」作為媽咪嘅佢，當然知道做唔到，但又唔想令囝囝難過，於是答應對方，囝囝終於安心瞓覺。

網民睇到兩母子對話都直呼好感動：「我要哭了啦」、「Dalton是小暖男」、「童言無忌最是感人」，亦有網友講笑話：「是不是要先研究如何活到140歲？」點都好啦，有個咁冧豬嘅囝囝，真係幾辛苦都值得！