港姐變髮｜爆粗Chloe風騷入圍　力撼谷胸Fiona

《2021香港小姐競選》進行完2輪面試後，今早（21日）有一班候選佳麗分批現身位於九龍塘的髮型屋接受「變髮」大改造，大部分佳麗到場都一律封口、守口如瓶，最多只肯透露姓名及歲數，唯獨有爆粗是非纏身的「城大私影妹」梁允瑜（Chloe）有開「金口」，並以清涼「戰衣」上陣，白色連身Tube Dress短裙晒線頭兼修長美腿，問到選美路有否受是非影響？她禮貌說：「唔答啦！下次再講啦！」然後就急步入髮型屋。

其他佳麗包括有身穿藍色碎花裙的25歲劉珍寶（Brillian）、密實打扮的21歲張嘉倩（Michelle）、全黑行政裝扮的24歲姜嘉琳、深綠上衣配白色半截裙的26歲「豪放版方媛」陳聖瑜、鬼妹仔Jasmin、谷胸着花花連身裙的Fiona、米白色連身裙的「健碩麥明詩」Carina、白色裇衫配黑褲的梁菁琳、連續2年參選的賴彥妤（Vivienna），而陳詩帆則以格仔衫現身，另有一名操不純正的廣東話的佳麗，但沒有透露姓名。

約12時半，首名「變髮」的佳麗陳聖瑜率先行離開髮型屋，不過事前、事後變化不大，只是將秀髮變曲，受訪時她表示入圍前已做過漂染，故剛剛齋修剪頭髮，問到她可滿意新造型？她說：「幾好、幾鍾意。（喺入面有同其他佳麗傾偈？）未有，但喺面試嗰陣有識啲佳麗做咗朋友。」Michelle緊隨步出，同樣變化不大，她指有剪染頭髮，很滿意新造型；Fiona則一直躲避鏡頭，不願受訪；Rachel齋剪頭髮沒有漂染，問到今日見到其他候選佳女有增強信心？她笑謂平常心。

陳詩帆是目前變化最大，由長髮剪成短髮，甫受訪表示好鍾意新造型，感覺好清爽，惟問到她之後如何備戰？她竟無厘頭答：「呢個你問人哋啦！（你點備戰問其他人？）我比較怕醜。」Jasmin受訪時問到上次面試後是否太攰而於港鐵車廂中瞓着？她笑稱相中人不是她，又說參選期間會盡量做更好，講到上屆冠軍謝嘉怡都是混血兒，會否頓時覺得增加勝數？她笑話：「唔知睇個樣佢哋鍾唔鍾意，但會努力練好廣東話。（有人話你似陳展鵬，你都覺得？）我有睇佢社交平台，覺得佢幾靚仔，所以如果似佢都唔緊要、唔介意，但我條眉可愛少少。」

Chloe臨離開前受訪，表示剛有做Treatment及剪頭髮，之後就會開始為比賽進行Keep弗大計：「保持平常心。（今日係最Sexy嗰個！）係咩？哈哈！（有冇被是非影響心情？）冇，都係以前過去嘅事。（怕唔怕會有更多黑材料流出？）以前過去發生咗嘅事我控制唔到。（你係比較大情大性？）都係，唔介意將情緒表露出嚟。」續被工作人員立刻帶走。梁菁琳及Carina分別指滿意新造型，後者更說已開始為比賽選購戰衣。

今早身穿粉紅色貼身吊帶裙的佳麗，變髮後終透露姓名是葉靖儀（Michelle），她表示有剪劉海，都好滿意新造型。講到她的社交平台有大量火辣水着，她笑言喜愛戶外活動，保持健康體態，之後會再勤加做運動保持身材。

曾參加多次選美的Vivienna捲土重來參選港姐，成功入圍表示好開心：「平常心啦！（你經驗豐富。）每次都係盡量做，上年咁啱要隔離冇得繼續參選都有啲可惜。（諗住點備戰？）準備瞓多啲，然後希望遲啲可以將自己嘅各方面、演藝Skills展示畀大家睇。（識咁多藝人朋友拉票實掂？）我都有好多親朋戚友支持。」

另外，原定下午4時到髮型屋的入圍佳麗「港大Law霸」Kimberlie，則遲到現身，問下次會否控制好時間？她未有回應就速逃。