洪永城C君做靈異劇監製勁驚青　日落前要度劇本

藝人洪永城（Tony）與C君今日（21日）出席新劇《凶宅清潔師》拜神儀式， 兩人除演出外，Tony身兼監製一職，C君更是監製兼編審，Tony坦言首次做監製大感壓力：「原來係好辛苦，好多嘢要處理，我做演員都唔係處理得咁好，好彩有C君互相扶持，公司嘅監製都畀好多意見，咁就放心啲。」

C君表示向來很怕觀看靈異題材的東西，但偏偏身為編劇而需要看大量相關材料，他笑言：「我度完橋都唔敢揸車或者一個人搭?，有時做到凌晨收工，我會叫老婆落嚟接我，佢就算一個人睇恐怖片都唔驚，所以佢係一個指標，我會將我哋嘅嘢畀佢睇，問佢驚唔驚，佢話如果喺電視睇會驚，但其實冇乜嘢嚇到佢，佢連我都唔驚。」

Tony笑指要日落前度劇本，日落後收工，又稱為令C君克服恐懼而叫對方負責編劇。問到拍攝期間可有遇上怪事？他們慶幸劇集已拍畢大半，至今沒有怪事發生，C君表示：「我哋去到一啲睇落去好恐懼嘅地方，原來好多外國人鍾意嚟影相，影出嚟好靚，減輕咗我哋嘅恐懼感。」