徐若瑄難頂嚴重胃酸倒流　火燒心憂以後冇得唱歌

台灣女星徐若瑄近排身體響警號，早前自爆有「胃食道逆流」（即胃酸倒流）困擾嘅佢，發文指自己火燒喉導致乾咳成一個多月，尋日（21日）佢就同大家「報平安」，指自己終於有好轉，仲有時間可以去做Gym添。

佢一嚟就發文指自己火燒心、火燒喉、乾咳都有好轉！雖然前兩日心情好差，不過佢終於都釋懷：「不舒服到懷疑人生，覺得以後是不是沒有辦法再唱歌給你們聽了…也想着我何德何能能讓大家支持我30年。」佢續指自己開始食胃食道逆流藥，亦冇再掂咖啡、酒、油炸品、朱古力、甜食、茶，不過自己就中晒「歌手死穴」，即係胃食道逆流同過敏，不過大家唔使擔心，佢就承諾會陪多大家至少30年咁話！