Stanley@MIRROR殺入台劇　亞太影后激讚唔似新人

男團MIRROR人氣強勁，每次現身都會引起哄動，早幾日出活動啲粉絲多到逼爆商場相當誇張！佢哋嘅人氣唔係只限於香港，好似Stanley（邱士縉）就成功殺入台灣，佢有份演出嘅犯罪懸疑劇依家播緊，唔好以為男團出身跳唱冇難度但係演技會差啲，佢嘅演出獲亞太影后張榕容激讚認真唔簡單！

Stanley嘅角色係嚟自香港在台留學，因協助由張榕容飾演嘅刑警調查變態內衣賊案件而結識，仲成為對方嘅粵語老師，所以佢哋會有唔少對手戲，而張榕容日前接受訪問時對佢讚譽有加：「Stanley演技相當成熟，完全不像新人，拍攝對手戲前的情緒培養也很到味。」而導演都話開頭誤會咗佢會係能歌善舞嘅藝人，估唔到演技都咁令人滿意，算得上係拍呢套劇嘅意外收穫。