周子瑜豪捐50部呼吸防護器　38萬做善事係生日願望

台灣疫情爆發，藝人賈永婕出錢又出力為醫護準備餐盒之餘，又號召藝人捐贈醫療器材，繼早前徐熙娣（小S）被網民嫌只捐一部「救命神器」高流量氧氣鼻導管全配系統（HFNC）太少，指「非常不符合財力比例」。

尋日（23號）賈永婕公布最新善心藝人名單，其中韓國女團TWICE台灣成員周子瑜透過陶晶瑩聯繫主動幫忙，一口氣捐出50部呼吸防護器（PAPR），慈善冇猶豫，仲話呢個係周子瑜嘅生日願望，難怪賈永婕大讚好暖心之餘，連其兩女兒都讚佢係真正嘅女神！一部PAPR價值28,000台幣（約7,700港幣），換言之合共花費140萬台幣（約38萬港幣），子瑜真係人美心更美，抵佢紅呀！而今次小S亦有再參與，並捐出20部咁多，相信今次唔會畀網民嫌少啩？