7月之星︱Anson Lo Tiger獲粉絲租巨型廣告位賀壽

人氣男團MIRROR 12子各有粉絲，繼姜濤、Ian生日獲粉絲落廣告燈箱慶生，7月之星Anson Lo（盧瀚霆）及Tiger（邱傲然）亦收到粉絲巨型廣告慶祝，依家啲粉絲真係豪氣！有「教主」之稱嘅Anson Lo下月7號26歲生日，有份主演ViuTV劇集《大叔的愛》快將播映，加上亦將推出新歌，粉絲「神徒」梗係連忙幫偶像造勢，花足10萬租下尖沙咀碼頭巨型廣告位，以大頭Chok相賀「教主」之餘，大家仲可以去打卡！

而下月3號22歲生日嘅Tiger，獲粉絲「小虎隊」租下25個廣告燈箱賀壽，亦於中環荷李活道訂下一個Digital Panel播放影片，Tiger尋日（24號）已去打卡！粉絲更安排多個生日應援物，包括120頁照片集、真皮杯套、縮骨雨傘、口罩套等，認真有心思。