柯震東屙尿「有困難」頂唔順　全家飛美國抖氣

台灣男神柯震東近日為佢間餐廳做生招牌，四出送外賣，得到唔少網友大讚貼地，正面評語愈嚟愈多，不過原來係有苦自己知，尋日（24日）佢開Live，親自分享連續3日做外賣仔心得，坦言過程相當辛苦：「真的是找不到尿尿的地方，認真很難找，Respect外送人員！」

開Live時，佢坦言因為疫情影響餐廳營運，加上房租、人事成本需負擔，外賣成為唯一收入，所以佢先會想用呢個方式幫忙推廣：「我該送的藝人朋友們都送了，沒有送的就…抱歉。」雖然佢係揸自己車送外賣，且一日只送3個小時，不過3日落嚟佢都覺得好攰。此外，有傳佢將同家人飛往美國出遊，並喺洛杉磯度假一段時間，經理人未有正面回應，僅表示此趟如同往年一樣，柯家都會安排全家出遊。