鐵三角不再︱江嘉敏繼續冇影　馮盈盈獲劉佩玥送波慶生

前港姐冠軍馮盈盈本月10號27歲生日，雖然已過半個月，但人緣甚佳嘅佢生日飯仲未食完！今次到劉佩玥同埋女助手，除咗選址喺金鐘五星級酒店享用生日飯，佢哋仲好有心思特意訂製多個氣球，相當有儀式感。不過馮盈盈眼大睇過龍冇發現氣球上印有「Happy Birthday FYY」字句，要劉佩玥同佢講先知，笑言成間餐廳嘅人都睇到，除咗佢。馮盈盈話呢個係最驚喜嘅生日之一，有網民感到可惜「鐵三角」唔係昔日好姊妹江嘉敏，而變咗女助手。