憶哥哥臨終前溫暖舉動　秦沛爆張國榮係救命恩人

藝人張栢芝孖住秦沛同鄧萃雯出席內地綜藝節目，三人在聊天之餘，還興致大發一起唱K，當螢幕播出已故巨星張國榮（哥哥）嘅KTV時，秦沛一度擰歪面，好似怕喺鏡頭面前情緒失控，之後佢就鬧咗句：「臭小子！」其實佢唔係鬧哥哥，只係同哥哥好熟的暱稱。

秦沛話同哥哥曾經合拍電影，就係嗰次哥哥成為佢嘅救命恩人，佢話：「有場戲話哥哥揸車撞埋嚟，架車就着晒火，就喺嗰時哥哥突然好嚴肅咁同我講，話我都冇自己嘅戲，快啲走開，初時我以為佢講笑唔理佢，但佢就好緊張咁叫我快啲走，之後仲夾硬拉我出去，就喺我哋走開咗嘅時候，架着咗火嘅車突然爆炸，嚇到我哋呆咗，嗰時開始我一直記住佢救過我。」

秦沛又話記得哥哥離世前一個星期，喺酒店碰過面，他又說：「嗰次我哋撞見，但我喺樓上，佢喺樓下，我想落樓搵佢，佢就對我嘟起個嘴畀飛吻我。」他好感慨話估唔到嗰次喺佢哋最後一次見面。喺秦沛身邊嘅雯女眼紅紅話：「佢係我最愛嘅男人」，不過佢講嘅愛，係出於粉絲嘅愛慕，唔係愛情。