舉家遊西安冇人認得？甄子丹右手拖囡囡左手攬老婆

「宇宙最強」甄子丹最近忙於為英皇電影《怒火》宣傳，不過好在佢都識忙裏偷閒，搞完工作佢就一家四口留喺內地，先去上海玩，原來轉個頭又飛咗去西安體驗生活。見老婆汪詩詩晒出多張合照，佢哋成程食好、住好，一對仔女更加係去了解當地唔同古蹟文化，估唔到佢哋低調出門都被偶遇！

有網友就晒出四人同行嘅背影照，先爆喺西安偶遇甄子丹舉家，大讚佢「真的帥」之餘，仲透露佢哋一路上都冇畀人認出，不過網友就Focus喺甄子丹貴為大明星，一啲架子都冇，同屋企人出巡都冇帶保鏢，佢仲右手拖實囡囡、左手攬住老婆纖腰以防走散，而阿仔亦翹住媽咪手臂，人鏈格局外遊。