謝安琪清純素顏登場　變身多功能歌手！

歌手謝安琪（Kay）自資成立唱片公司「淺白本部」後，即推出首次親自包辦曲、詞、編、監作品《離不開》，MV方面原來亦係由佢落手落腳籌備，近日佢喺社交平台Upload咗條約5分半鐘嘅MV花絮片。甫開始就見Kay以清純素顏登場，佢話︰「繼小休之後我哋拍MV！但最勁係啲咩呢？歌手係自己揸車去。」去到現場之後佢就不停為任何事奔波，無論係枱面上嘅食物、道具、擺設，甚至會同導演傾MV鏡頭角度、燈光等，仲要同MV男主角柯煒林培養感情，Kay全部都親力親為，瞬間變成多功能歌手！

經常自我質疑

Kay於社交網出Post講出歌感受，自爆經常自我質疑，因為知道自己有好多不足，所以先會對自己好苛刻，就會唔小心畀自己太大壓力，不過正正因為呢個「質疑」，令佢學識虛心欣賞其他人嘅優點。之後再爆自組公司前有擔心過自己一個人會唔會難以承擔，但身邊嘅人畀咗好大嘅鼓勵佢︰「我知道我不需要是最武藝高強，我只需知道，我們團隊雖小，其實各有所長，而我珍惜你們每一分力量、一直衷心相信我。」