《少年的你》揚威海外　曾國祥握奧斯卡投票權

導演曾國祥去年憑話題作品《少年的你》獲提名奧斯卡最佳國際電影，代表香港出戰，雖然未有爭贏，但依然係對佢實力嘅認證。最近奧斯卡公布2021年新獲邀395位新會員名單，當中就見到曾國祥出現於名單之中，即代表佢手握來年奧斯卡投票權，非常威水。

其實奧斯卡金像獎（Academy Award）係每年由電影藝術與科學學院（The Academy of Motion Picture Arts and Sciences）組織與頒發。當中每個獎項都係由奧斯卡評審委員，即學院會員，共同投票選出當屆得獎者。