MIRROR「搞散」鏡粉頭家 逾10萬「苦主」網上聲討

2021年07月05日 12:02
東網電視
更多新聞短片
超強人氣組合MIRROR,令全港三歲到八十歲嘅女性全部中招變「鏡粉」,可以話係近十年都冇出現過咁超級瘋狂追星嘅景象,加埋兄弟團ERROR發力搶灘,香港真係「淪陷」喇!睇住另一半「鏡嫂」每日無「鏡」不歡,睇電視、聽歌、睇新聞全部都係MIRROR同ERROR,聲稱身心同經濟受創嘅「鏡佬」終於硬起來,前日(3日)搞咗個「我老婆嫁咗比Mirror導致婚姻破裂關注組」網上群組,唔夠三日,受害人數(成員人數)最高峰更加係超過10.5萬人!
「鏡佬」們狂出post狂呻,不單覺得日日戴住「綠帽」,就連經濟同身心等全方位受控同受虐。有好彩嘅「鏡佬」話改進埋夫妻甚至婆媳關係(唔明?老婆同奶奶因為變『鏡粉』而friend晒囉!),但有「鏡佬」話5千蚊消費券保唔住,三餐不繼,冇啖好食,甚至自我懷疑變攣!呢種怨氣,可以話係前所未有!就連花姐都有留意呢個群組:「其實啲老公、男朋友們都好可愛,睇啲post睇到唔捨得瞓!」點止?包你笑到喊!
‧「你哋夠我激?我瞓喺個男人(Ian攬枕)隔籬!」
‧「有日見到姜濤行過,我老婆即刻追咗出去,剩低我同兩個女企喺度,我個女問:『媽咪去咗邊?』我唔識答。」
‧「有次鏡仔有活動,我就話要返學冇時間去,阿媽教我走堂...之後阿爸開口,邊有阿媽教個女走堂追星,我最後係冇被煽惑。」
‧「女朋友強行攬住我,話叫我幻想吓佢係姜B,然後我真係有半秒覺得畀姜B抱緊可能都唔錯,我係咪已經攣咗?」
‧「我老婆話我排名係17位。mirror 12 + error 4」
‧「各位人哋老公申請咗消費券未?你哋預咗嗰5000蚊唔屬於你哋,係屬於MIRROR。」
‧「我架單車被人偷咗,嬲到話要去報警,但我老婆掛住睇MIRROR,我話報警都唔睬我!」
‧「有冇試過同老婆開心緊嘅時候,佢無啦啦唱辣辣辣辣辣辣着,跟住男士要縮到要入院治療?」
‧「我老婆鍾意咗個咩啫喱米(Jeremy),話我係肥大叔,唔似得佢又高又瘦又靚仔。老婆平時買支水都唔捨得,啫喱米一代言雪條,百幾蚊兩盒好似唔使錢咁掃貨!我日日食雪條,一打開雪櫃,全部都係雪條雪條雪條,難怪我係肥大叔,雪櫃已淪陷!」
‧網友A:「我真幸福,老婆今晚去觀塘買咪華(MIRROR)精品,把雪了多個月的雞肉做了凍雞畀我做晚餐,感動到流眼淚...」
網友B搭嗲:「我有魚肉腸加餸,同即沖面豉湯」
網友C:「食完未死,就上嚟報個平安!」
‧「點解MIRROR唔代言PS5?」
‧「身邊啲全職媽媽,以前湊仔湊到個人殘晒,日日X爆個老公乜乜乜,老爺奶奶物物物,日日怨婦咁X樣,自從MIRROR同ERROR出現,呢堆阿太朋友回晒春咁,有啲同奶奶關係好咗,一隊MIRROR勝過一堆面膜補品。」
‧「同老婆講,我7/7開會唔番屋企食飯,佢秒回我:冇問題,7/7 Anson Lo生日」
‧「姜濤一出post,我就算開緊會,老婆都call爆我,要我like and comment!」
‧網民A:「強烈要求MIRROR同ERROR集體出嚟公開道歉!!!」
網民B:「首先,呢場道歉show,你要去撲飛!」