姜濤被迫着泳褲 花姐恐嚇:仲要係白色!
20210705
東網電視
更多新聞短片
![](/hk/bkn/cnt/entertainment/20210705/photo/bkn-20210705174650190-0705_00862_001_01p.jpg?20210706043114)
人氣男團MIRROR成員姜濤、Jer,將於9月尾孖林家謙及Tyson Yoshi齊齊開拉闊音樂會,今日(4日)舉行記招宣傳。活動後Jer表示正揀歌,想跟其餘3子齊齊玩跳唱:「大家入場都係想睇呢啲啫!(叫林家謙跳唱?)突破嘛!佢話OK㗎,哈哈!」姜濤就話本身《Master Class》是與Tyson Yoshi合唱,惟當時對方不在香港,故更期待今次跟對方合作。
問到二人會否賣大包騷肌?Jer對姜濤笑言:「你騷我就騷!」姜濤即時反白眼說:「我驚啲人走晒。(走埋台?)咁我有能力都會騷嘅!或者騷鎖骨。(咁錫身?)我怕嚇親大家,為大家眼睛着想。」Jer接話指無論騷與不騷,都要操體能練氣,即被姜濤踢爆「偷食」:「頭先邊個喺嗰張枱食得咁開心?」Jer心虛笑言:「我通常都係早兩個禮拜先準備。」
講到ViuTV跟無綫撞橋搞星級版「港奧運動會」,姜濤指都是剛剛才得悉。續說MIRROR及ERROR除了跟鄧麗欣「搓波」打排球外,還會落水晒「鵰」,姜濤聞言勁大反應,即刻耍手擰頭話介意:「花姐(經理人)唔會畀呢件事發生㗎!我怕着咗公司要同我解約!(但Fans想睇你着喎!)過唔到內心嗰關,中學游水堂都唔上,身材唔好嘛!有都想騷!(你有『士啤胎』?)都有㗎。」此時,花姐突入加把口「恐嚇」姜濤:「唔記得同你講,唔止着泳褲,同埋仲要係白色!」嚇到姜濤O晒嘴,繼而放寬底線,他笑言:「平腳都得嘅⋯或者着潛水衣游水。」而Jer亦自稱保守派,不能輕易着泳褲:「唔似Stanley成日露手臂。」
再提起有「鏡佬」於社交平台開設一個名為「我老婆嫁咗比Mirror導致婚姻破裂關注組」群組,不少「受害者」出Post「公審」另一半的追星行為,例如有「鏡嫂」將家中其中一面牆貼姜濤巨版海報、逼老公跟姜濤着同一套衫、又有發開口夢叫「要Jer Jer」,他們笑說有追Post睇,姜濤大讚牆紙好靚:「唔知邊度買?」然後多次「認錯」:「唔好影響夫妻關係,唔好意思,對唔住你哋!希望老公都可以同老婆聽吓我哋啲歌。」對有「鏡嫂」指要另一半「上繳」消費卷5,000元,然後投資落MIRROR,Jer表示這樣不太好:「大家有經濟自由,買咩係自己取態、有決定權。」並呼籲女Fans不要強迫另一半:「啲Post唔一定係真實嘅,可能係笑料一則,大家飯前、飯後娛樂吓。」
最後,講到《調教你MIRROR》播畢後,不少Fans留意姜濤及Tiger之間的互動,打趣問雙方每日有講夠50句說話?姜濤笑言很難:「之前唔開口講,真係成年冇10句。(有傳Tiger同余潔滢拍拖,有冇八卦問?)我哋未去到傾感情呢個層面,都係停留喺就咁『Hi』佢、或者問佢食咗咩。」