反覆暗示「未遇到彩虹」　楊冪疑與魏大勛分手

內地當紅花旦楊冪同大陸小鮮肉魏大勛嘅戀情疑幻疑真，二人從來冇認過愛，但就頻頻被拍得拍拖上酒店、用同樣家具等，又傳過二人有意結婚，惜大家嘅願望要幻滅喇，因為近日楊冪為宣傳新劇接受內地媒體專訪時，佢就多次提到好鍾意「斯人若彩虹，遇上方知有」呢句說話，更忽然直言：「這句話那麼美，那麼浪漫。戲裏的女孩不曾遇見這樣的愛情，寧可保持單身，但這樣的人是有的，這樣的愛情也會有的，我跟大家一起期待，我也在等待着我的彩虹。」明言自己依家單身，並觸動網友神經，紛紛討論指佢係暗示自己同魏大勛分手。

而早前，楊冪就喺節目中提到「前任」，指自己唔會將前任當人脈，仲講到明自己亦唔會幫「前任」動用人脈，明顯分手要狠！