張敬軒臨危受命 捱義氣幫李克勤做《聲夢傳奇》主理人

2021年07月06日 19:01
東網電視
更多新聞短片
無綫歌唱選秀節目《聲夢傳奇》主理人李克勤因工作關係要忍痛離別學員,不過佢冇「離棄」過呢班「阿仔阿女」,仲係好緊張有得留低嗰6位學員,包括姚焯菲(Chantel)、炎明熹(GiGi)等嘅終極表現,所以佢喺最後嗰兩集,除咗會遠距離同班學員打氣外,原來仲留住隻「超級彩蛋」畀佢哋,就係私下碌盡「人情卡」,請嚟同門張敬軒亮相節目,希望啲學員喺最後關鍵階段,都可以得到啲激勵,等佢哋喺舞台上,無論聲、色、藝都有進一步表現!
至於克勤點解搵軒仔?原來因為克勤留意到喺比賽期間,都好多學員都會揀軒仔嘅歌曲參賽,而最後6強參賽者嘅何晉樂(Rock)及冼靖峰(Archie)仲視軒仔係偶像,所以克勤就鎖定軒仔做目標!而軒仔都樂於接受呢個「任務」,因為軒仔都有留意到呢班學員嘅表現,覺得佢哋好有天分,所以當克勤問軒仔有冇興趣做「壓軸主理人」時,軒仔都好快答應咗。
軒仔笑稱:「我同班學員相處時間唔長,但既然李生係《聲夢》嘅奶爸,我頂多都係做佢哋嘅『保母仔』,我希望喺臨近決賽呢個過程中,可以幫助學員減低心理壓力,我會將自己一啲喺台上面紓緩壓力嘅方法分享畀佢哋聽!」
另外,軒仔憑專輯《The Brightest Darkness》嘅《俏郎君》同埋《Sweet Escape》一炮雙響,兩首歌橫掃「903專業推介」、「中文歌曲龍虎榜」、「新城勁爆流行榜」、「勁歌金榜」及「Chill Club推介榜」成為雙「五台冠軍歌」得主,未到最要發力嘅年底前,已揮低所有同期推出新歌嘅男歌手,其中包括近期人氣爆錶嘅男團MIRROR同個別單飛發展成員姜濤同Edan。
有「核數師」歌迷預測軒仔正「叫胡」,曾奪「男歌手金獎」、「我最喜愛的男歌手」、「至尊歌曲大獎」同「我最喜愛的歌曲大獎」和「唱作人金獎」共5個大獎嘅佢,只要「食出」喺明年初舉行嘅叱咤頒獎禮中嘅「至尊唱片大獎」,就能完成「叱咤金滿貫」大業,追平張學友17年前創下嘅輝煌成就!
軒仔受訪時表示開心成立新Label「飛圖唱片」公司後,推出嘅首張唱片就有好成績,要多謝東網、樂迷同埋各大平台支持,希望有機會在不同場合演繹這兩首歌曲,亦感激歌曲創作、MV拍攝幕前幕後嘅團隊所付出嘅努力,而今年會繼續製作更多好作品回饋歌迷!