港姐回帶|周潤發Mark哥造型做主持 蔡少芬Sell六合彩去越南

2021年07月07日 00:03
東網電視
更多新聞短片
每屆香港小姐競選,除咗泳衣環節受注目外,問答環節都好多人鍾意睇,皆因主持們會問一啲刁鑽問題,令到一班候選佳麗難於應對,從中可以睇出佢哋嘅執生能力,講起主持,一班天王天后級人物都曾經做過,好似國際巨星周潤發咁,佢就做過1991年度嘅主持,而蔡少芬就係其中一位佳麗。
發哥當年以佢最出名,喺《英雄本色》入面嘅「Mark哥」造型現身,身穿黑長褸內襯西裝,斯文又有型,作為一位咁有性格嘅演員,佢問問題都唔同過人,唔止齋問仲準備咗道具,佢喺大褸攞出一張巨型六合彩,問蔡少芬點樣張呢個香港特色介紹畀越南人,佢就答呢個係香港嘅一種娛樂,仲可以畀到希望大家,當時因為仲有「越南難民」問題,發哥追問怕唔怕有再多嘅越南人嚟香港,蔡少芬好淡定全程保持笑容,佢再解釋係想藉住六合彩呢個希望,可以幫到越南人解決困難。今屆港姐準決賽就喺8月22日舉行,一班候選佳麗真係要學吓師姐蔡少芬咁答,以真善美作為出發點就實冇錯。
關於越南難民喺度講番少少資料,1961年越戰爆發,唔少越南人紛紛逃亡到不同地方,1979年香港被列為「第一收容港」,從越南出逃的難民,由第一收容港先行接收,再經西方國家甄別難民的資格,符合甄別標準的難民可轉去其他國家定居,剩下的則由「第一收容港」自行遣返。呢個政策於1998年1月9日取消,期間香港共收容了超過20萬名越南人,估計每位難民每年大約需要花費公帑1萬2千港元,令香港政府的負擔加重。