《盛．舞者》林子超跳到爆缸入院縫針

藝人林子超近日參加無綫全新真人騷《盛．舞者》，畢業於香港演藝學院現代舞文憑課程嘅佢未有掉以輕心，賽前上堂做運動操Fit自己，點知喺拍攝片頭時，因為欄杆濕滑而跣腳，不幸受傷，佢話：「其實嗰part舞，一開始係我由欄杆跳落地下，點知成個人跣腳，個人向後跌，個頭首先落地流晒血，染到成件衫都係。」

但佢依然堅持先要完成自己嘅部分，最後拍攝四個小時之後，先揸車到醫院縫針，佢話：「我縫針之後有幾日郁唔到，最可惜係條片出街之後，我覺得自己表現未如理想，仲發現當時自己叫工作人用膠紙貼傷口唔好用膠布，真係跌到傻咗。」

昨晚（8日）播出的一集，分成3隊作賽，分別是王君馨帶領的《Hot Flavaz》、狄易達帶隊的《Last Attack》及麥秋成的《TX Crew》。各隊輪流作團隊跳，由評判即場畀分，王君馨隊獲240分、狄易達隊獲229分，最高分一隊是麥秋成隊，獲得264分，王君馨跳完氣喘喘，狄易達激動謂「好想話畀大家聽街舞可以上大台」。而評判對參賽者有讚有彈，袁鎮業（Kelvin）被彈冇進步，會拖累其他人，而方紹聰（奶仔）和陳俊堅則被點名讚。