黎明開騷|林海峰做頭場嘉賓硬食金句無言以對

20210710
東網電視
更多新聞短片
天王黎明(Leon)一連9場嘅《Leon黎明Talk & Sing 2021紅館演唱會》今日(10號)舉行頭場,呢個騷最特別嘅地方,就係演唱會同棟篤笑二合一,可以畀佢盡情發揮「金句王」本色,首場嘅嘉賓就係同樣Talk得嘅林海峰(Jan),佢喺社交網上載咗開騷前2星期嘅後台花絮,仲大爆Leon同佢對答嘅搞笑金句!
一開波Jan對Leon講,話多謝請佢做嘉賓,但係有啲頭痛,喺金句王面前唔知噏咩喎?Leon就答:「Hey!Jan…噏咩,Up to you la。」Jan都唔知點接,惟有話:「到綵排時我再大概話你聽噏咩啦。」點知Leon再嚟多句:「綵排綵排都不及天意安排啦。」一向頭腦轉數快嘅Jan都搞到無言以對,最後選擇終止對話。
作為頭場觀眾嘅DJ當奴(唐劍康)亦有喺社交網上載演唱會現場片段,其中一段係Leon與Jan合唱姜濤嘅歌曲《蒙著嘴說愛你》,見全場觀眾揮手High到爆,而姜濤亦有在社交網上載現場片段並寫上:「謝謝」。