一日少女！賴慰玲陳嘉寶撇低仔女喪食過生日

藝人賴慰玲早前35歲生日，獲好閨蜜「SÏXTERS」蔡思貝、陳瀅、吳嘉禧（Cheronna）及何雁詩慶生，獨欠好友陳嘉寶（Anjaylia），過咗幾日，換咗短髮新Look嘅Anjaylia終於為賴慰玲補祝生日，兩人難得撇低仔女做一日少女，行街喪食又齊齊嘟嘴合照，Anjaylia留言：「生日快樂！Pancake、車仔麵、沒有目的地的閒逛...雖然好像過得很隨便，但你舒服、喜歡就好，說來有點不可思議，但這是陪你過的第九個生日了！願你像pancake一樣，一直輕鬆甜蜜又幸福。謝謝你懂我，感恩我也懂你。」並不忘表示掛念其他幾位「SÏXTERS」嘅好姊妹，網民期待佢哋可以再次齊人合體。