黃凱芹戲曲中心開騷：唔想做Cheap咗件事！

有「唱作詩人」之稱的黃凱芹，將於7月中假西九文化區戲曲中心大劇院舉行演唱會，今日（12日）於九龍灣進行綵排，他坦言因自己是首位於西九大劇院舉辦流行音樂會的歌手，坦言有種使命感，不希望給人感覺「踩場、做cheap咗件事」，他説：「想做到劇院式表演嘅感覺，本身場地夠晒華麗，係爭張紅地氈啫，大家着得靚靚去睇歌劇表演咁，我仲靜雞雞通知咗粉絲到時唔好送花、舉牌，又或者帶晒啲燈五顏六色咁，一來唔襯個場合二來會騷擾到其他人，不過我絕對歡迎尖叫同原地企起身跳舞㗎！」

他指自己演唱會一向會唱自己出過唱片的歌，今次也不例外：「會唱自己嘅歌，可能係當年冇咁hit嘅歌，又或者以前翻唱過其他歌手嘅歌。（會唔會有嘉賓？）我從來唔考慮，因為到人哋開嗰陣，我可能又唔喺香港，還唔到人情債呀，另外因為我會為演唱會寫個rundown，入面有起承轉合，如果中間要夾個嘉賓，佢唱隻歌可能未必夾到，不過我知道到時會有當年寶麗金年代嘅朋友仔會嚟坐喺下面聽。（會臨時請佢上台？）梗係唔會，疫情嘛，握手都唔得呀！哈哈！」