明星運動會︱黃庭鋒上演「帽子戲法」要多謝一個人

藝人黃庭鋒近期獲無綫力捧，除將會做男一，與女神湯洛雯及蘇皓兒大鬥戲法外，近日喺節目《明星運動會》擔任主持，對於曾任體育主持嘅佢，今次可謂駕輕就熟，他說：「我最主要嘅角色係大會嘅直擊報道員，但同時間亦都係代表藍隊比賽。知道有份參加足球比賽之後，即刻搵咗徐榮去傾吓嗰陣容，發覺原來有好多好波之人都喺藍隊。比賽之前大家想夾下點踢，但最終大家夾唔到時間，所以係冇出到嚟練習。但比賽當日又踢得好順，大家又有好默契，最後我入咗3球上演『帽子戲法』，亦好多謝馬貫東守龍門好出色，冇佢我哋唔會零失球。」

認真比賽好熱血

黃庭鋒曾經喺2016年擔任過奧運主持，佢原以為今次運動會以藝人為主，打算訪問時以娛樂性為主，但原來發現大家都好認真比賽，令佢有番當年主持奧運嘅感覺：「每次比賽完左即刻去訪問啲藝員，我一開始諗住以娛樂性為主，但發現大家好認真比賽，感覺好熱血，從來都無諗過可以將運動會拍做一個節目，雖然我今次參與運動唔多，但做直播同藝員邊拍嘢邊玩遊戲都好正，希望呢股運動狂熱可以延續落去。」