半山豪宅4年升值1億！關之琳超豪魔衣櫥曝光

「大美人」關之琳於2017年以1.5億元購入半山3,000呎豪宅，持貨近4年，近日有人以2.5億元放售同類型單位連車位，雖然佢係自住，但依家市價喺4年內升咗1億元，足以令之之瞓着都識得笑。

而近日醉心拍短片嘅佢，繼早前斬件式令大廳、飯廳、睡房逐一曝光後，喺最新一條短片中，就將佢衣帽間大公開，到底大美人嘅神秘魔衣櫥有幾豪，就嚟一次過大公開！

片中之之化身人偶，被手指控制住，然後走入衣帽間，其魔衣櫥裝修奢華，鋪晒地氈，目測起碼300呎，比好多劏房仲大，之之喺衣櫃前拎住靚衫左拼右拼，非常貪靚。有網民都留言話，之之個衣帽間仲大過佢間屋：「咁大個衣帽間，換咩衫都得啦！」