那英唔敢出聲　黃子韜喪父一年終極崩潰爆喊

韓國男團EXO前中國成員黃子韜（Tao）含住金鎖匙出世，可惜父親黃忠東去年不幸病逝，Tao繼續努力營運由父親創辦嘅娛樂公司，喪父之痛忍足一年，近日佢喺內地綜藝節目《萌探探探案》中，就提及父親病逝前嘅心路歷程，佢表示爸爸隱瞞病情一年，自己同媽咪一直唔知情，直到爸爸病況惡化，佢打電話畀爸爸打足兩星期都冇人聽，最後先知父親已經住院：「他還在挺，我當時在錄節目，他在電話裏說『兒子，爸沒事，我都給你準備好了，你別擔心我，好好錄節目。』」而佢身旁嘅那英都唔敢出聲，淨係低頭坐喺度，神情嚴肅。

Tao仲提到爸爸當時臨走前患腦血栓，到最後一刻兩個人都傾唔到一句偈，佢又話自己經常向父母表達愛意，但父親離世令佢非常後悔：「我一直以為我做得很好，我每天都會跟我爸媽說我愛你，但我並不真正了解他們到底是如何生活，我不在的時候他們是怎麼過的，我們打電話了解的一切有可能都是假的。」他仲呼籲子女們要多關心父母。