「宇宙最強」嚇窒對手　甄子丹被打嫌唔夠大力

講起「宇宙最強」甄子丹，就自然會諗起佢嘅經典對白：「我要打10個」，功夫了得嘅形象深入民心！平時喺電影通常都係見佢打人，佢畀人打兼爆樽就唔係常見，為咗有最好效果，佢喺新片入面仲叫對手出力打，咁樣觀眾先會睇得真實，工作態度夠晒專業！

即將上映嘅電影《怒火》近日流出幕後花絮片段，當中甄子丹要拍一幕被打戲份，不過佢個名實在太響亮，嚇到打佢嘅演員有啲淆底，仲提議不如遠距離掟個水樽落佢度就算。一向工作認真嘅甄子丹當然唔會就咁拍，佢叫對方放膽衝埋嚟打佢，最後仲被兜頭爆樽添！甄子丹之後表示：「要觀眾睇得真實就要出盡力打，不過大前提係要確保安全，千萬唔好有斷手斷腳嘅情況出現，呢啲大家都唔想見到。」

每次出盡力打，受傷都好難避免，但係佢就算搞到周身傷，只要對住鏡頭，都會即時晒V兼露出笑容，面對任何嘅艱難場面，佢都會笑笑口去面對，難怪台前幕後都大讚佢夠晒專業。而同樣有份演出嘅謝霆鋒，就孖住甄子丹拍片宣傳新片，佢哋一齊向鏡頭行，姿態Chok到盡，中途仲變出兩支長槍，認真有型有款！