陳柏宇1,500呎豪宅全面睇！衣帽間大過你間屋

歌手陳柏宇（Jason）去年曾租住九龍區一間逾千呎豪宅，而早前佢哋一家三口搬到何文田新屋，有指近1,500呎，月租要6至7萬！而最近Jason同囡囡Abigail開直播時就公開千呎豪宅，隔空帶大家睇樓！

佢話依家間屋比之前嗰間大咗幾百呎，但反而租金更平，而囡囡初時仲以為係Staycation！眼見個大廳有落地大玻璃，景色相當開揚，除咗主人房，囡囡依家有自己房，Jason又展示雜物房、晾衫房，因為老婆仲瞓緊覺，所以Jason就冇公開主人房！而全屋重點相信係個超大衣帽間，有成3個大衣櫃，又有個大廁所、化妝枱等等，係女人見到都羨慕呀！

而全屋連工人房總共有4個大廁所，任何時候都唔使爭呀，連Abigail都有專屬廁所，不過佢話囡囡間房就細咗！而唯一佢唔滿意嘅係Wifi唔夠強，走廊打落啲房都收唔到訊號，搞到佢要向網民求救，問有咩方法可以改善呀！