小糯米疫境靠視像見楊冪　劉丹：有部電話畀佢用！

藝人劉丹今日（19日）出席《愛．回家之開心速遞》之「開心迎奧運」活動，有指前媳婦楊冪因疫情已有成年時間冇見女兒小糯米，劉丹直認是事實，問到有否見孫女跟楊冪視像？他說：「唔知佢哋有冇，但小糯米係有部電話畀佢用。（咁細個有電話？）都係有限度用嘅。（聽過孫女話掛住媽咪？）咁又冇，疫情都好難見。」講到小糯米將升小二，劉丹感慨說時間一眨眼就過：「佢依家真係好得意！成日都湊佢，玩得好開心。（暑假有安排啲咩畀孫女？打西洋拳？）唔會，哈哈！網球、Golf、畫畫，好多都係室外運動。」

劉丹席上講笑話最鍾意睇體育節目，因為可以「睇肉」，又謂特別鍾情足球及西洋拳賽事，兼自爆年輕時有打過西洋拳2年，惟入行拍劇後就冇再玩：「費時打到面青口唇白、又腫晒！」會同孫女「小糯米」一齊睇奧運？他笑說都可以，一定會支持香港運動員，但不能太夜：「睇完《愛．回家》就要瞓！平時睇到電視有我都會好捧場叫爺爺，見到我畀人恰仲會喊！」