聲夢傳奇︱揮低姚焯菲!炎明熹奪全場總冠軍
《聲夢傳奇》決賽今日(19日)舉行,最後兩強為炎明熹(Gigi)和姚焯菲(Chantel),兩人均以快歌迎戰,Chantel唱出《Chotto等等》,而Gigi演唱美國天后Lady Gaga的《Bad Romance》,兩人即時炒熱全場氣氛!最後Gigi強勢橫掃全晚3個大獎,先以22分大拋離只得3分的Chantel,奪得「《聲夢傳奇》專業評選大獎」,並在全球網絡投票活動中,以最高票數奪得「《聲夢傳奇》觀眾熱選大獎」外,更獲得全晚最高殊榮:全場總冠軍「《聲夢傳奇》傳奇新星」!
一人獨攬3個大獎的Gigi先多謝評審:「其實個獎唔止我一個,多謝Gin Lee老師同團隊以及台下老師。」之後她多謝家人時,邊說邊落淚,其他學員也被感動到眼濕濕,她說:「我其實好想多謝幫助過我嘅人、隊友們、老師們,我仲要同姑丈、父母講我得咗喇!同埋一直冇諗過自己會攞獎,而且我一直嘅目標係想返去探父母、爺爺、嫲嫲、公公、婆婆。姑丈應承我,話攞獎後一定可以返去探佢哋,我暑假得閒就會即時去搵佢哋,無論你哋睇唔睇到。」
目標係買10層樓
賽後Gigi接受訪問,坦言得獎感覺「唔真實」:「心情興奮得嚟,又唔係好真實,唔覺得自己會攞到冠軍,覺得自己喊得好醜樣。(你嘅得獎感言講到好感動。)之前姑丈同我講,如果你好想返去探父母就要攞獎,父母喺汕尾,公公婆婆喺石家莊,我一直好想去探佢哋,所以好努力去比賽。(你攞完獎好忙喎!)係,但都想抽時間。(點解唱第一首歌時喊?)之前我唱呢首歌都冇感動到,但今日一唱就畀啲情緒感動到而喊。(10萬蚊獎金點用?)會儲起佢,我想買層樓畀佢哋,遲啲目標想買10層樓,我會唱歌同學業兩邊兼顧。」
曾志偉讚Gigi似梅艷芳淡定
無綫副總經理曾志偉接受訪時,被問到可有貼中Gigi?他說:「有貼佢,因為知道啲分數,家庭觀眾投票都係佢最高分,但只係諗住佢攞一兩個獎,冇諗過攞晒。覺得佢好似梅艷芳以前咁,喺舞台好淡定,天生係食呢行飯,把聲亦係天畀佢。」志偉說導師讚Gigi懂得尊師重道,吸收能力亦很強,並懂得感恩。
問到資源會否重點放在Gigi身上?他說:「必然,15個參賽者都會有。(會唔會安排佢拍劇?)都會,李敏寫緊劇本,叫做《青春的我》,15個學員都會參加,仲有《盛.舞者》幾個學員,喺講校園,大概8月尾開拍,等佢哋開完音樂會,休息多幾日先。」
而Gin Lee受訪時表示為Gigi感到驕傲,她說:「一班學員成長好多,過程唔容易,佢哋咁細個承受咗好多壓力,又要返學、又要準備考試。(Gigi攞獎你都喊晒?)我係好投入,今日好似畢業禮咁。(遲啲同佢哋一齊拍劇?)真係唔知,但我好鍾意演戲。(名師出高徒?)名唔名就唔知,但嚴厲就一定係,多謝佢哋嘅信任。(Gigi表現點?)佢係實至名歸,佢好勤力,我好感動,因為佢一直好謙卑、虛心學習,有好成績係值得。(推薦佢做師妹?)我都想,交畀公司決定。」