【舊照出土】炎明熹壓力大到喊!全靠佢鼓勵圓歌手夢

20210720
東網電視
更多新聞短片
《聲夢傳奇》塵埃落定,最終炎明熹(Gigi)擸3個大獎威到盡,喺賽後訪問佢多次提到姑丈,仲話好感激對方,因為父母喺內地工作,佢細個喺姑丈屋企住,當年都係姑丈發現佢有唱歌天分,跟住鼓勵佢去學唱歌,先至會有今日嘅成績。之前喺排練時,Gigi因為壓力太大喺化妝間坐咗喺度喊,姑丈就喺隔籬陪住佢同安慰,除咗幫佢抹眼淚,仲教佢要控制自己嘅情緒,睇得出佢哋感情好好,畫面充滿溫情!
而Gigi喺最後對決中揀咗美國天后Lady Gaga嘅《Bad Romance》嚟唱,其實佢喺一條訪問中講過好鍾意聽英文歌,Lady Gaga亦係佢鍾意嘅歌手之一,當時13歲嘅佢個樣同依家相比唔算相差好遠,最大嘅分別係表情,佢喺攞獎一刻都係冇乜笑容,畀人一種高冷嘅感覺,反而當年條片佢不停笑,好活潑開朗,喺片中佢話:「如果我能夠做實力派嘅話,會教多啲人唱歌,畀多啲人認識音樂,實力夠的話會去做歌手。」依家攞晒獎成功踏上歌手之路,終於都圓夢啦!