隔離悶到慌 任賢齊晒才藝寫西夏文書法字體

2021年07月21日 11:01
東網電視
更多新聞短片
藝人為咗工作經常要做「空中飛人」去唔同地方,撞正疫情要隔離,郁吓手都話要1個人困喺酒店14日,真係唔容易!好似任賢齊(小齊)咁,早前佢去咗上海展開第8次隔離生活,佢仲搞笑自封「隔離天王」,佢拍咗條片分享困喺間房做啲乜打發時間!
好多藝人都會做吓運動,消磨時間之餘仲可以Keep Fit,小齊就玩另類晒才藝,見佢用Marker筆喺個木盒面畫畫,佢完全冇起草稿即興畫,經一輪工夫之後,畫咗太陽同向日葵等圖案,中途發生意外,佢支筆畫畫吓突然冇墨,好彩有後備先至可以完成。之後佢再晒書法,用咗唔同嘅字體書寫,其中比較特別係一款「西夏文」,有傳呢種文字成千年前由大夏國主李元昊命大臣野利仁榮創製,字體複雜筆畫繁多,因為大部分都係會意合成字,即係將兩或三個漢字合成一個字,現今識寫嘅人真係唔太多,好多網民留言都話估唔到小齊咁博學多才,連咁少見嘅字都識寫,認真係文武雙全!