直擊東京奧運！方力申孭住重型器材連踩多個場館

曾代表香港出戰奧運嘅方力申（小方），早前已經抵達東京，為無綫直擊奧運實況，到埗後，小方就喺社交網分享佢嘅日程，佢昨日（20日）就去咗奧運場地視察，佢連踩多個場館，包括BMX racing 競速小輪車競技場、體操場館、網球場館，佢都話大開眼界，小方又不忘為香港跳馬運動員石偉雄打氣。

小方貴為明星，但佢一啲都唔歎，見佢孭住重型攝錄機行咗兩萬步，然後仲要冇車返酒店，同兩位工作人員孭住大型器材徒步返回酒店，睇見都辛苦。但係小方就話好值得：「拋低香港啲工作嚟做奧運，係值得嘅，如果唔係做奧運唔會見到咁樣嘅場地，不過好可惜係咁多座位，冇咁多觀眾可以入嚟睇。」辛苦咗一日，小方返回酒店就食晚飯，佢將照片分享到社交網，有刺身、壽司、番茄等，都相當豐富！