家傳之寶原來係件Tee 林心如為咗佢怒炒助理!

2021年07月21日 12:03
東網電視
更多新聞短片
台灣女星林心如自從結婚生女後,已減少幕前演出,近年主動出席珠寶品牌活動,一嚟可以袋出場費,二嚟又可以揀佢最愛嘅珠寶首飾,可謂一舉兩得。有傳佢已收藏咗成億珠寶,不過有傳佢嘅家傳之寶,唔係鑽石鏈之類嘅貴重嘢,而係一件唔可以洗嘅衫,仲有傳佢為依件衫怒炒咗一位助理,到底呢件衫有乜咁巴閉呢?
話說佢一向請專業嘅家務助理嚟打掃屋企,有日助理打開佢衣櫃,見到有件tee污糟咗,就好盡責咁自動波幫佢拎去洗,仲洗得一乾二淨,點知心如打開衣櫃發現件衫唔見咗,就問助理:「那件衣服呢?你該不會拿去洗了吧?」助理立即去攞番嗰件乾淨衫畀佢,仲心諗一定被讚洗得白淨時,心如就好似撻着咗,喪鬧個助理:「這件衣服不能洗,你知道這件衣服有錢也是買不到的!」助理就答佢話:「如果洗壞了,那就用我的工資來扣吧,不行的話,就用我一年的工資。」心如聽完仲嬲話:「你知道這件Tee多少錢嗎?你賠得起嗎?」最後聽聞助理被炒魷。
原來嗰件心如口中嘅「有錢也是買不到的」Tee,其實係佢偶像木村拓哉嘅簽名衫,助理竟然當佢偶像嘅親筆簽名係「污糟嘢」咁洗咗去,的確係好似世界末日咁難受,因為佢追星多年,千辛萬苦先攞到簽名,仲曾經當件衫係家傳之寶咁收埋,依家化成烏有又難怪佢嬲到想劈友!