生完兩個Keep住靚!鍾嘉欣全靠自家製蔬果汁

2021年07月21日 14:05
東網電視
更多新聞短片
現年37歲嘅女神鍾嘉欣,雖然已為兩個小朋友之母,但仍保養得宜美貌依然,早前佢就拍片大談保養心得,但原來要Keep住健康仲有一個秘訣,就係全靠自家製嘅蔬果汁!
呢日佢就分享蔬果汁食譜,佢透露昔日於香港生活、仍活躍於幕前時,身體經常出現小毛病及炎症,但自從婚後定居溫哥華並生兒育女後,為咗有強健體魄照顧仔女,故決定注重營養飲食,於是展開新習慣,過去四年每星期都會飲蔬果汁,當中包括用到青蘋果、西芹、羽衣甘藍等多種蔬菜,其中佢提到羽衣甘藍含豐富鈣質及鐵質,而且含有葉酸,對孕婦非常有益,至於薄荷葉就可以去除口氣,亦有預防癌症嘅功效。
另外,佢又會為仔女炮製蘋果橙汁,並從中加入蘿蔔及西芹,部分更會整成雪條,令小朋友更易接受。不過嘉欣就表示蔬果汁製作需時,而且洗洗切切會令手臂變粗,更自爆因此有主婦手:「我之前好唔錫身,我唔用手套,隻手開始變乾,變咗主婦手,但我唔想佢咁早嚟,所以就開始戴手套。」但強調為咗健康所有付出都係值得。