東京採訪奧運 吳業坤每日得15分鐘出街買補給

20210722
東網電視
更多新聞短片
東京奧運會喺周五(23日)就開幕,有份去東京做採訪工作嘅吳業坤同周奕瑋,就喺《東張西望》分享喺疫情受管制吓,每日都要面臨嘅挑戰。原來佢哋每日都有15分鐘限時出街補給,可以走出指定嘅酒店,到最近嘅便利店買日用品,但如超時就可能被沒收記者證,見佢哋好似如臨大敵咁,戴晒口罩又各自揸住自拍神器出動,佢哋先要喺酒店保安員度登記個人資料同外出時間先,之後就要以極速1分鐘時間,急步行去便利店度買嘢。
由於呢15分鐘相當寶貴,所以佢哋要爭取時間分頭買嘢,話自己冇底褲嘅吳業坤,就第一時間去買底褲,仲面對鏡頭話:「中碼啦,雖然我覺得係大碼。」之後就滙合周奕瑋買微波爐叮叮飯盒,再排隊畀錢,再放飯盒入對微波爐幾分鐘等翻熱,當驚見只淨番1分19秒就夠鐘時,兩條仔唔理個飯盒又幾「辣手」照拎走,兩人一手拎住膠袋,另一隻手就捧住飯盒飛奔返酒店,喺呢個生死時刻中就出事,吳業坤個飯盒蓋跌咗落地,唔想做垃圾蟲就停步嘅佢,邊烏低身邊叫周奕瑋走先,而周奕瑋真係好聽話跑住走,好在連仆帶跑最終都趕得切喺「死線」前返到酒店。
嚇到差啲標尿嘅吳業坤話:「冇諗到差啲因為一舊垃圾,而令我變咗一舊垃圾。」周奕瑋話如果有一天被人逮捕,或收咗記者證就唔好怪佢哋,吳業坤就答周奕瑋:「唔會啦,我依家識掉低你,你掉低咗我一次。」似乎「嬲嬲豬」位戰友大難臨頭各自飛喎。