鄧詠雪搞海底影展 潛水愛好者望梅止渴!

2021年07月22日 10:03
東網電視
更多新聞短片
藝人鄧詠雪(Suetzi)原定喺呢個月或下個月再去台灣繼續拍攝工作,可惜遭台灣疫情嚴重而被迫煞停,佢話:「其實證件都批晒,我都準備好晒,但係依然台灣仲係第3級管制,封晒關,所以暫時留喺香港,去酒店staycation,着泳衣曬吓太陽、游吓水,做吓運動先囉。」
她又話一直都有留意台灣嘅情況,知道當地台灣人都好慘,每日都係返工、放工,其餘時間都要留喺屋企,肚餓都只係叫外賣或自己煮,唔會再出街食飯,所以佢都祝願台灣疫情早日受控制,可以恢復開關:「我知有好多港、台兩地情侶、夫妻,因為疫情分異兩地成年咁耐,希望快啲恢復正常,等佢哋可以見番面,我又可以去台灣做嘢。」
雖然台灣之旅未能成行,但佢都唔得閒,因為好多朋友知佢鍾意潛水,影過好多做美人魚嘅水底潛影相,所以就慫恿佢開海底影展,佢話都心動緊:「都想畀人睇吓世界各地嘅海底係點,水底影相又係點,亦都想借呢個相展,帶出海洋保育嘅訊息,又可以畀好耐冇去潛水嘅愛好者,睇相當望梅止渴,頂住啲潛水癮先,依家我仲構思緊,物色緊場地,如果有贊助想合作,梗係無任歡迎啦。」