恐怖蠟像館︱楊冪驚變大媽　紙紮范冰冰嚇親人

擁有蠟像呢樣嘢，係藝人們嘅身份象徵，冇返咁上下人氣，人哋先唔會幫你整蠟像！如果個蠟像係進駐杜莎夫人蠟像館，就話威威豬啫，如果係進駐恐怖蠟像館，咁就真係慘慘豬喇！最近，有網友收集咗恐怖蠟像嘅相，一次過擺晒上網同大家分享，如果班巨星們見到呢啲走晒樣嘅蠟像，唔知會有咩反應呢？

楊冪出名樣靚身材正，仲係內地一線小花，曝光率極高！有網友晒出楊冪嘅恐怖蠟像，呢個山寨蠟像真係不得了，面色暗黃不特止，仲要雙眼無神，面部浮腫，成個大媽咁款，真係嚇鬼死人，同本尊差好遠！其實楊冪仲有另外一尊蠟像，係劇集《三生三世十里桃花》嘅造型，有粉絲見到呢座蠟像即時色心起，嘟嘴咀落蠟像度，相片喺網上流傳，即時引起公憤！

另外，范冰冰同埋舒淇都係受害者，佢哋嘅山寨蠟像都係假到冇朋友，全都面目全非，衰啲講，其實似紙紮公仔多啲囉！天王周杰倫同樣無辜中招，佢嘅山寨蠟像除咗眼細細似之外，其餘冇一忽係似佢本人，周董見到之後唔知會唔會激到血壓上升呢？