吳若希拍片證破冰!爆蔡嘉欣內心脆弱忍唔住爆喊

2021年07月22日 14:25
東網電視
更多新聞短片
前港姐蔡嘉欣與歌手吳若希(Jinny)因合作節目《姊妹淘》而屢傳不和,近日佢哋孖住拍片正式「破冰」!其實佢哋私底下向來老友,但無奈外界經常誤會,Jinny即為好友澄清:「如果我哋真係唔啱,你唔會喺我頻道見到佢啦,真正不和嘅人唔值得上嚟!」
豈料二人「破冰」未幾,又立即「不和」,突然互數對方缺點,蔡嘉欣指Jinny只懂掛住笑,Jinny即表示:「就係你呢啲性格,講嘢太直白得罪人,唔識隱藏自己。」又大爆蔡嘉欣表面堅強實則內心脆弱,更趁機為佢平反:「但佢鏡頭背後,試過喺我屋企忍唔住係咁喊,佢喺出面就『我就咁㗎啦,有咩問題你話我囉』,私底下就『我覺得自己真係好委屈』,成日有好多報道話佢炫富、買樓,好多呢啲小誤會令大家以為佢係咁嘅人,但佢又唔會出嚟解釋。你應該好似其他人咁扮儒弱,戴番個面具。」
而講到有咩比對方優勝,Jinny笑指比對方多兩個小朋友,蔡嘉欣亦指有受Jinny影響,開始憧憬生兒育女:「我識咗你之後有啲被說服到,有小朋友嘅生活都唔錯,幾和諧幾開心,人生追求嘅去咗另一個層次,我積極考慮,但係若干年後,唔係依家。」至於提到傳不和,蔡嘉欣反而笑指驚訝竟然有人相信,更指要繼續與Jinny扮不和「造新聞」,佢哋又對《姊妹淘》結束感不捨,但強調友誼不變。