蘇志威做馬主為圓夢！劉小慧爆冇錢賺：輸到嘔電

藝人蘇志威與太太劉小慧昨晚（22日）出席新城電台節目，與聽眾分享飼養愛駒點滴。當年因拍劇而立志成為馬主的蘇志威，現時擁有兩匹愛駒，被問到當初挑選準則時，蘇志威說：「我邊識呀好高深㗎，又要請血統、毛色，唔係咁易學㗎！對上一隻都係我uncle幫我喺美國揀嘅。」身旁的小慧續說：「每個馬主都有唔同目的嘅，我老公就係為完咗個夢想，唔係為跑好成績，跑第一固然開心但唔係重點，我哋好錫佢哋㗎，同練馬師溝通都係要以佢哋健康為重，唔會狂操佢哋，希望以開心為先。其實行內人都知道得百分之5嘅馬主有錢賺、百份之25唔使蝕，其餘7成都係輸到嘔電。（咁蘇老闆係？）梗係嗰7成啦，哈哈！」二人又表示雖然喜愛，但不打算學習策騎，因為覺得太危險，小慧說：「我真係有諗過學，練馬師朋友叫我唔好傻，個個學策騎都一定會撻過落地，你幾廿歲唔係好襟撻㗎。」

過幾天便是小慧的50歲生日，他們透露到時會做直播，有好大驚喜給粉絲，但內容現時要保密，着大家24號晚要留意。