幕後「畫家」曳曳出手！岑麗香湊仔冇咗件衫

藝人岑麗香雖然生咗兩個小朋友，有雙重嘅「甜蜜負擔」，但身形完全冇走樣，仲愈嚟愈索！最近忙於喺屋企一打二嘅香香，不時喺社交平台分享湊B趣事，近日見佢仲自創咗套湊B神招，唔好睇佢Upload嗰張相只係抱住細仔「小腰果」咁冇乜特別，除咗隔住個Mon、齋睇香香背脊都Feel到佢散發出嚟嘅嗰陣濃厚母愛之外，亮點就喺佢件湖水藍色上身衫度，驚現有好多用顏色筆畫上去嘅「戰績」！

香香用英文留言話︰「當你好忙咁湊緊一個BB嘅時候，另一個就會畫你嘅背脊。」另外，佢仲加咗個無奈掩面Emoji，字裏行間好明顯香香講嘅「另一個」就係大仔Jacob，而呢個幕後「畫家」畫出嚟嘅「傑作」用色鮮艷，意境十足，好似畫緊湖邊嘅草叢，非常有藝術細胞！雖然香香件衫好似毀咗咁，但相信佢係唔會介意嘅，仲應該會好好珍藏！